Аргентина обезбеди место во четвртфиналето на Светското првенство, откако по драматичен натпревар го совлада Египет со 3:2. Светските шампиони направија неверојатен пресврт во последните минути, иако до 79. минута имаа негатива од два гола.
Египет одигра одличен натпревар и уште во 15. минута поведе преку Јасер Ибрахим. Африканската селекција продолжи со дисциплинирана игра, а во второто полувреме Мостафа Зико ја зголеми предноста на 2:0, оставајќи ја Аргентина пред елиминација. Дополнителна самодоверба за Египет донесе и одбранетиот пенал на голманот Мостафа Шобеир, кој беше еден од најдобрите поединци на теренот.
Кога изгледаше дека Египет е на чекор до историски успех, Аргентина го покажа шампионскиот карактер. Кристијан Ромеро во 79. минута намали на 2:1, а само неколку минути подоцна Лионел Меси погоди за израмнување и ја врати надежта кај „гаучосите“. Во судиското продолжение, Енцо Фернандез го комплетираше спектакуларниот пресврт и ги постави конечните 3:2.
Со оваа победа Аргентина продолжува во четвртфиналето, каде што ќе се соочи со Швајцарија во борбата за место меѓу четирите најдобри репрезентации на Мундијалот. Египет, и покрај елиминацијата, го напушта турнирот со високо кренати глави по одличните настапи и големата борба против актуелниот светски шампион.